24 მარტი სამცხე-ჯავახეთის სახელმწიფო უნივერსიტეტში მიწვეული იყო გორის სახელმწიფო სასწავლო უნივერსიტეტის რექტორი, პროფესორი გიორგი სოსიაშვილი. თავდაპირველად ოფიციალური ნაწილში ორ უნივერსიტეტს შორის განახლდა და ხელი მოეწერა ურთიერთთანამშომლობის მემორანდუმს, რის შემდეგაც სამეცნიერო ბიბლიოთეკაში გიორგი სოსიაშვილის შემოქმედებით დაინტერესებულ საზოგადოებას სამცხე -ჯავახეთის უნივერსიტეტის რექტორმა, ბატონმა მერაბ ბერიძემ წარუდგინა იგი, როგორც მწერალი.
სტუმარს მიესალმნენ განათლების, ჰუმანიტარულ და სოციალურ მეცნიერებათა ფაკულტეტის დეკანი გულიკო ბექაური და რექტორის მოადგილე სამეცნიერო დარგში მაკა კაჭკაჭიშვილი.
ბატონი გიორგის შემოქმედება, კერძოდ მისი პროზაული ნაწარმოებები განიხილეს პროფესორებმა ქეთევან გრძელიშვილმა და ვახტანგ ინაურმა, სტუდენტებმა ხატია ნატრიაშვილმა და მარიამ პეტროსიანმა. ასევე, ბატონი გიორგის შემოქმედებაზე ისაუბრა გორის უნივერსიტეტის ადმინისტრაციის ხელმძღვანელმა, პროფესორმა გიორგი ხორბალაძემ. აღინიშნა, რომ გიორგი სოსიაშვილი ქართულ თანამედროვე მწერლობაში ახალგაზრდა და გამორჩეული ხედვის მწერალია, რომლის შემოქმედებასაც ლაიტმოტივად გასდევს სამშობლოს უსაზღვრო და ტკივილით სავსე სიყვარული: იგი დღემდე ოჯახთან ერთად ცხოვრობს ქართულ-ოსური კონფლიქტის გამყოფ ხაზთან, სოფელ დიცში.
ბოლოს, ბატონმა გიორგიმ მადლობა გადაიხადა მისი შემოქმედების ესოდენ დაინტერესებისათვის, ისაუბრა სამომავლო გეგმებზე.