მიმდინარე წლის 17 მაისს Zoom-ის გამოყენებით გაიმართა შეხვედრა უნივერსიტეტის ძირითადი დაინტერესებული მხარეების (სტუდენტების, პერსონალის, კურსდამთავრებულებისა და დამსაქმებლების) წარმომადგენლებთან, რომელსაც უძღვებოდა უნივერსიტეტის სტრატეგიული განვითარების საბჭოს თავმჯდომარე, პროფ. ალექსანდრე მღებრიშვილი. შეხვედრაზე განიხილეს უმაღლესი საგანმანათლებლო დაწესებულებების ავტორიზაციის საბჭოს რეკომენდაციების გათვალისწინების მიზნით სსიპ გორის სახელმწიფო უნივერსიტეტის მისიაში და 2020-2023 წლების სამოქმედო გეგმაში ცვლილებების შეტანასთან დაკავშირებული საკითხები. აღნიშნული დოკუმენტების სამუშაო ვერსიები შეხვედრის მონაწილეებს წარუდგინეს სასწავლო პროცესის მართვის სამსახურის უფროსმა ც. დურულმა და ხარისხის უზრუნველყოფის სამსახურის ხელმძღვანელმა ლ. მიდოდაშვილმა. შეხვედრის დასასრულს ა. მღებრიშვილმა აღნიშნა, რომ სტრატეგიული განვითარების საბჭო ყურადღებით განიხილავს როგორც შეხვედრის პროცესში წარმოდგენილ ყველა რეკომენდაციას, ასევე მოსაზრებებს, რომლებიც შესაძლებელია ნებისმიერმა დაინტერესებულმა პირმა წარმოადგინოს 14 სამუშაო დღის განმავლობაში უნივერსიტეტის საზოგადოებასთან ურთიერთობის სამსახურში ან უნივერსიტეტის საკონტაქტო ელექტრონულ მისამართზე.