2022 წლის 31 მაისიდან 3 ივნისის ჩათვლით, თურქეთში, ყარსის კავკასიის უნივერსიტეტში, საერთაშორისო საგაზფხულო სტუდენტურ დღეებში მონაწილეობის მისაღებად, სხვა ქვეყნებისა და ქალაქების უნივერსიტეტებთან ერთად ვიზიტით იმყოფებოდა გორის სახელმწიფო უნივერსიტეტის დელეგაცია (ადმინისტრაციის წარმომადგენლები, სტუდენტები და უნივერსიტეტის ჯაზ-ბენდი).
გორის უნივერსიტეტის სტუდენტებმა ყარსის კავკასიის უნივერსიტეტის სტუდენტებთან ერთად მონაწილეობა მიიღეს საზეიმო ღონისძიებებში.
უნივერსიტეტის ჯაზ-ბენდმა ,,კანუდოსმა“ ფესტივალის გახსნის ცერემონიალზე გამართა სოლო კონცერტი, რომელსაც სტუდენტებთან ერთად ესწრებოდნენ ყარსის უნივერსიტეტის რექტორი, პროფესორი ჰუსნუ ქაფუ და ადმინისტრაციის სხვა წევრები.
კვირეულის მიმდინარეობისას გორის უნივერსიტეტის წარმომადგენლები ასევე, სტუმრობდნენ ყარსის კავკასიის უნივერსიტეტის კავკასიური ენებისა და ლიტერატურის, ქართული ენისა და ლიტერატურის განყოფილებას, რომლის ორგანიზებითაც გორის უნივერსიტეტის ადმინისტრაციის ხელმძღვანელმა, პროფესორმა გიორგი ხორბალაძემ წაიკითხა ლექციების ციკლი ,,ქართული ლიტერატურის განვითარების გზა და თანამედროვეობა“.
ლექციების ციკლი საკმაოდ საინტერესო ვითარებაში წარიმართა, მსმენელებმა დიდი ინტერესი გამოხატეს ქართული ლიტერატურის საკვანძო საკითხებზე, რასაც ამომწურავად პასუხობდა მომხსენებელი, იქნა გამოთქმული ინიციატივები ერთობლივი კვლევების განხორციელებაზე. ასევე, სამომავლო პერსპექტივაში ფილოლოგიური მიმართულების გაცვლითი პროგრამების დაგეგმვის შესახებ.
ბატონ გიორგი ხორბალაძეს აღნიშნული სალექციო ციკლის წარმართვისთვის სერთიფიკატი გადასცა ქართული ენის განყოფილების ხელმძღვანელმა, პროფესორმა მაია მესხიძემ, სტუმარი ასევე დააჯილდოვა რექტორის მოადგილემ,ბატონმა ენგინ ქილიჩმა.
გორის უნივერსიტეტის დელეგაციისა და უნივერსიტეტის სახელით, გულითად მადლობას ვუხდით გამოჩენილი განსაკუთრებული ყურადღების, შესანისნავი მასპინძლობისათვის და ნაყოფიერი ვიზიტის ორგანიზებისათვის, ყარსის კავკასიის უნივერსიტეტის რექტორს -პროფესორ, ბატონ ჰუსნუ ქაფუს, პრორექტორს - პროფესორ, ბატონ ენგინ ქილიჩს, ყარსის კავკასიის უნივერსიტეტის ქართული ენის განყოფილების ხელმძღვანელს ქალბატონ მაია მესხიძეს, ბატონ როინ ყავრელიშვილს, ქალბატონ სუდან ალთუნს, ასვევე ადმინისტრაციის სხვა წევრებს, რომლებიც მაქსიმალურად და უშურველი მეგობრობით უზრუნველჰყოფდნენ გორის უნივერსიტეტის დელეგაციას ვიზიტის დღეებში. ვიმედოვნებთ ორ უნივერსიტეტს შორის ჩამოყალიბებული პარტნიორული ურთიერთობები კიდევ უფრო გაღრმავდება და ნაყოფიერი იქნება ორივე უნივერსიტეტისათვის.