ა/წ 21-23 ოქტომბერს აზერბაიჯანის რესპუბლიკის დედაქალაქის ბაქოს სლავისტიკის უნივერსიტეტში ჩატარდა რიგით IV საერთაშორისო კონფერენცია ლიტერატურათმცოდნეობაში, რომელზეც წარმოდგენილი იყო 60 მოხსენება მსოფლიოს სხვადასხვა ქვეყნის მეცნიერებისა (არბეთის გაერთიანებული ემირატი, თურქეთი, შვედეთი, ავსტრალია, ბულგარეთი, ჩეხეთი, რუსეთი, ირანი, საქართველო). მუშაობდა ხუთი სექცია. ბოლო დღეს გაიმართა მასტერკლასები ბაქოს სლავისტიკის უნივერსიტეტში, იდეათა გაცვლა და დისკუსიები.
საქართველოდან კონფერენციაზე წარმოდგენილი იყო ოთხი მოხსენება. აქედან ერთი შოთა რუსთაველის სახ. ლიტერატურის ინსტიტუტიდან, ორი სოხუმის სახელმწიფო უნივერსიტეტიდან და ერთი გორის სასწავლო უნივერსიტეტიდან. ჰუმანიტარული ფაკულტეტის სრულმა პროფესორმა, ფილოლოგიის მეცნიერებათა დოქტორმა თამარ გოგოლაძემ კონფერენციაზე წაიკითხა მოხსენება „ლეილისა და მაჯნუნის არაბული სიუჟეტის ინტერპრეტაცია თეიმურაზ I „ლეილმაჯნუნიანში“.
კონფერენციის დასასრულს მეცნიერებს გადაეცათ სერთიფიკატები და სამახსოვრო საჩუქრები.