მიმდინარე წლის 28 ივნისს გორის სახელმწიფო სასწავლო უნივერსიტეტს სტუმრად ქართველი- ებრაელი მეცნიერებისა და საზოგადო მოღვაწეების (ისრაელი, აშშ) დელეგაცია ეწვია, სადაც გაიმართა წიგნის "ქართველ ებრაელთა პოეზიის ანთოლოგიის" პრეზენტაცია. ნაშრომში თავმოყრილია ქართველი-ებრაელი პოეტების ნაწარმოებები. პროექტის ავტორი და წიგნის მთავარი რედაქტორია ისტორიის მეცნიერებათა დოქტორი, შალვა წიწუაშვილი, ხოლო მასთან ერთად აღნიშნული პროექტის განხორციელებაზე მუშაობდნენ: ბატონი გერშონ ბენ ორენი, ბატონი ნუგზარ ჯანაშვილი და ქალბატონი ნანა შაბათაშვილი-დავარი. წიგნი დავით ბააზოვის სახელობის საქართველოს ებრაელთა და ქართულ-ებრაულ ურთიერთობათა ისტორიის მუზეუმის მხარდაჭერით გამოიცა.
ღონისძიების მეორე ნაწილი დაეთმო რეჟისორ, ქალბატონ ნინო ყოლანდარიას ფილმის „არ დაგივიწყებ საქართველო“-ს ჩვენებას, რომელიც ეხება ქართველ-ებრაელთა ისტორიასა და ურთიერთობებს.
ღონისძიების დასასრულს, გორის სახელმწიფო სასწავლო უნივერსიტეტის რექტორმა, პროფესორმა გიორგი სოსიაშვილმა და ქართველ-ებრაელთა კვლევის ცენტრის ხელმძღვანელმა, ბატონმა შალვა წიწუაშვილმა ხელი მოაწერეს ურთიერთთანამშრომლობის მემორანდუმს, რომელიც ხელს შეუწყობს გორის სახელმწიფო სასწავლო უნივერსიტეტსა და ისრაელს სახელმწიფოს შორის მყარი ურთიერთობის დამყარებას, რაც იქნება საქართველო-ისრაელის მრავალსაუკუნოვანი ისტორიის გაგრძელების საწინდარი. უნივერსიტეტის რექტორმა, პროფესორმა გიორგი სოსიაშვილმა დამსწრე საზოგადოებას გააცნო რამდენიმე საინტერესო ინიციატივა ქართულ-ებრაული ურთიერთობის განვითარების საკითხთან დაკავშირებით, მათ შორის გორის უნივერსიტეტში ქართულ-ებრაული ურთიერთობების ცენტრის გახსნა და უნივერსიტეტის სტუდენტთა დახმარების ფონდის დაარსება.