2010 წლის 23 სექტემბერს გორის სასწავლო უნივერსიტეტის რძის გადამამუშავებელ საწარმოს საქართველოს მთავრობის, ევროკავშირისა და გაეროს განვითარების პროგრამის (UNDP) დელეგაცია ეწვია. სიტყვით გამოვიდნენ: გიორგი სოსიაშვილი (გორის სასწავლო უნივერსიტეტის რექტორის მოვალეობის შემსრულებელი), პერ ეკლუნდი (ევროკავშირის წარმომადგენლობის ხელმძღვანელი საქართველოში, ელჩი), ჯეიმი მაკგოლდრიკი (გაეროს განვითარების პროგრამის (UNDP) ხელმძღვანელი), მატი ლამპი (სურსათის უვნებლობის ექსპერტი, GRM international AB), ირინა ქურდაძე (საქართველოს განათლებისა და მეცნიერების მინისტრის მოადგილე), ზურაბ არსოშვილი (პრეზიდენტის სახელმწიფო რწმუნებული შიდა ქართლში), არჩილ ნიკოლაძე (სუპერმარკეტ „გუდვილის“ მენეჯერი).
სტუმრებმა დაათვალიერეს რძის გადამამუშავებელი საწარმო, რომელიც ოთხი თვის წინ გორის უნივერსიტეტის ბაზაზე გაიხსნა, ადგილობრივ ფერმერებს ემსახურება და პროფესიული განათლების კურსების სტუდენტებისათვის პრაქტიკულ სასწავლებელს წარმოადგენს. სტუმრები გაეცნენ ტექნოლოგიურ პროცესებს და საწარმოს მიერ „ნებიერას“ სახელწოდებით გამოშვებული პროდუქცია (რძე, არაჟანი, მაწონი, ხაჭო, ნადუღი, ყველის სხვადასხვა სახეობა) დააგემოვნეს.