2016 წლის 10 ნოემბერს, უნივერსიტეტის ჰუმანიტარულ მეცნიერებათა ფაკულტეტის დეკანი, პროფესორი იოსებ ალიმბარაშვილი, სოფ. ხიდისთავის თემის საკრებულოს დეპუტატ, ქალბატონ ლია კოვზიაშვილთან, გორის გამგეობის კულტურის ცენტრის დირექტორ, ქალბატონ გულნარა ბზიშვილთან, ცენტრის თანამშრომლებსა და აღსაზრდელებთან ერთად, ეწვია და გვირგვინებით შეამკო ცნობილი ქართველი მოღვაწის დიმიტრი მეღვინეთხუცესიშვილის (1815-1878) საფლავი.
ი. ალიმბარაშვილი დამსწრეებს ესაუბრა დიმიტრი მეღვინეთხუცესიშვილის ცხოვრება-მოღვაწეობაზე, მისი დამსახურების ქართული არქეოლოგიის, როგორც სამეცნიერო დარგის განვითარების, ქართული თეატრის პირველი ნაბიჯების, ადგილზე საგანმანათლებლო და საზოგადოებრივი დაწესებულებების დაარსების შესახებ. საქართველოს სხვადასხვა კუთხეებში ქართული ხუროთმოძღვრების ძეგლების, იმ დროისათვის იქ არსებული სიწმინდეების, ფრესკული და ლაპიდარული წარწერების აღნუსხვის, გადმოღებისა და სამეცნიერო ბრუნვაში შემოტანის თვალსაზრისით.