მიმდინარე წლის 7 თებერვალს გორის სახელმწიფო უნივერსიტეტის რექტორის, მწერალ გიორგი სოსიაშვილის პროზაული კრებულის - ,,იაილები“ პრეზენტაციას საქართველოს პარლამენტის ეროვნულმა ბიბლიოთეკამ უმასპინძლა.
ღონისძიებაზე ეროვნული ბიბლიოთეკის გენერალურმა დირექტორმა, ბატონმა გიორგი კეკელიძემ მიმოიხილა გიორგი სოსიაშვილის როგორც საგანმანათლებლო და სამეცნიერო, ამავე დროს სამწერლო მოღვაწეობა, აღნიშნა გორის სახელმწიფო უნივერსიტეტის წარმატებული პროექტების მნიშვნელობა, როგორც შიდა ქართლის რეგიონისთვის, ასევე მთელი ქვეყნის მასშტაბით მიმდინარე კულტურული პროცესების განვითარებისთვის.
პროზაული კრებულის ,,იაილები“ რედაქტორმა, ლიტერატურათმცოდნემ და პოეტმა, გორის სახელმწიფო უნივერსიტეტის პროფესორმა, გიორგი ხორბალაძემ ისაუბრა ავტორის განსაკუთრებულ სამწერლო ენაზე და ერთმანეთისგან განსხვავებული მოთხრობების იმ არქეტიპულ საერთო ნიშნულებზე, რაც გამორჩეულს ხდის აღნიშნულ კრებულს სხვა ლიტერატურული ნაწარმოებებისგან.
პრეზენტაციაზე გიორგი სოსიაშვილის ნაწარმოებების ირგვლივ ისაუბრეს: ფოლკლორისტმა და პოეტმა ეთერ თათარაიძემ, მწერალმა მიხო მოსულიშვილმა, საქართველოს საქართველოს კულტურის, სპორტისა და ახალგაზრდობის მინისტრის მრჩეველმა, პროფესორმა იოსებ ჭუმბურიძემ და სხვებმა.
ღონისძიების დასკვნით სიტყვაში გიორგი სოსიაშვილმა დამსწრე საზოგადოებას მადლობა გადაუხადა პროზაული კრებულით დაინტერესებისთვის და ისაუბრა იმ ინსპირაციებზე, რამაც ერთგვარი ბიძგი მისცა აღნიშნულ კრებულში შემავალი მოთხრობების შექმნისთვის.